Bu ilin yanvar ayında Türkiyənin Daxili işlər nazirliyi Ermənistanın Ədliyyə nazirinin müavini Tiqran Daduntsa xüsusi təşəkkür edib.
Səbəb isə, uzun illər Türkiyədə axtarışda olan cinayətkar qruplaşma rəhbərlərinin Ankaraya təhvil verilməsi olub.
Xatırladaq ki, Türkiyə DİN-i “X” sosial şəbəkəsində bəyanat yayaraq bildirib ki, Ermənistanla əməkdaşlıq nəticəsində Türkiyədə 6 və 15 il axtarışda olan İbrahim Kaymak və Ercan Yılmaz Ermənistanda həbs olunaraq Türkiyəyə ekstradisiya edilib.
Bəyanatda, Ordu vilayətinin polis idarəsi ilə əməkdaşlığa görə Ermənistanın Ədliyyə nazirinin müavini Tiqran Daduntsa təşəkkür edilib.
Hökumət iclasından sonra Factor.am saytının müxbiri nazir müavinindən soruşub: “Bu prosesdə hansı iştiraka görə Türkiyənin təşəkkürünə layiq görüldünüz?” Dadunts cavab verib:
“Bu sual üçün təşəkkür edirəm, çünki baş verənləri aydınlaşdırmaq imkanı verir. Bu, adi bir proses idi.
Həmin şəxslər Ermənistanda məhkum olunmuşdular, cəzalarını çəkdikdən sonra Türkiyə Respublikasına təhvil veriliblər, çünki orada da cinayət işi açılmışdı” – deyə Tiqran Dadunts bildirib.
Suala cavab olaraq ki, “Prosesdə sizin iştirakınız nə olub və Türkiyə rəsmiləri ilə hansı kanallarla əlaqə saxlanılıb?”, Dadunts deyib:
“Proses beynəlxalq konvensiyalar çərçivəsində həyata keçirilib və bu işlə nazirliyimizin müvafiq idarəsi, Ermənistanın Xarici işlər nazirliyi vasitəsilə məşğul olub.
Bilirsiniz ki, bizim diplomatik əlaqələrimiz yoxdur, ona görə də Xarici işlər nazirliyinin kanallarından istifadə olunub, yazışmalar aparılıb”.
