“Mülki Müqavilə” fraksiyasının deputatı: Ermənistanın mövqeyi belə olub və belə də qalır: qaçqınların hərəkəti ilə bağlı Azərbaycanla dövlətlərarası səviyyədə razılaşma olmayacaq.
Alınan məlumata görə, bu barədə Ermənistan Parlamentinin “Mülki Müqavilə” fraksiyasının deputatı Taquhi Ğazaryan parlament brifinqi zamanı bəyan edib.
“Hələ sülh müqaviləsinin mətni açıq olmadığı və danışıqların getdiyi vaxtda bəyan etmişdik, indi də mövqeyimiz dəyişməz qalır: hər hansı növ qaçqın yerdəyişməsi ilə bağlı dövlətlərarası səviyyədə razılaşma olmayacaq” — deyən deputat vurğulayıb ki, Ermənistan tərəfi bu məsələni müzakirə etmir və sülh müqaviləsində qayıdış məsələsi yoxdur.
Onun sözlərinə görə, fərdi vətəndaşlara gəldikdə isə, azad hərəkət imkanı yarandığı təqdirdə, hər hansı yerdə qalmaqla bağlı fərdi qərarların verilməsi həmin vaxtın hüquqi tənzimləmələri və hüquqi münasibətləri çərçivəsində həll olunacaq məsələdir.
Qarabağdan köçkün düşmüş şəxslərin qayıdışı məsələsinə toxunan Ğazaryan qeyd edib ki, Ermənistan hökuməti onlara dəstək proqramları təklif edib, Ermənistan vətəndaşlığını qəbul edərək bütün hüquqlardan yararlanmağı məsləhət görüb.
Deputatın fikrincə, hakimiyyətə gələcəkləri təqdirdə qayıdış üçün şərait yaradacaqlarını vəd edən bütün siyasi qüvvələr manipulyasiya ilə məşğuldurlar və bu insanların Ermənistanda məskunlaşmasına mane olurlar.
