“Anakliya, bir hakimiyyətin ölkənin tarixi fürsətini necə onillik yalan xronikasına çevirə biləcəyinin ən bariz nümunəsidir.
Gürcü Arzusu’nun artıq Anakliya haqqında danışmağa mənəvi haqqı yoxdur.
Artıq on ildən çoxdur ki, biz eyni tamaşanı izləyirik: baş nazirlər dəyişir, iqtisadiyyat nazirləri dəyişir, layihənin adları, onun icra modelləri və vədlər dəyişir.
Dəyişməyən yeganə şey nəticədir: Anakliya limanı hələ də mövcud deyil”— deyə “Lelo”partiyasının liderlərindən biri İrakli Kupradze bildirib. Bu barədə Gürcüstanın Birinci Kanalı məlumat yayıb.
Kupradzenin sözlərinə görə, Gürcüstanın hazırkı hakimiyyətinin strateji baxışı, beynəlxalq etimadı və milli əhəmiyyətli layihələri başa çatdırmaq bacarığı yoxdur.
“2016-cı ildə hakimiyyət bizi inandırırdı ki, ən yaxşı həll yolu BOT (Tik-İşlət-Dövr et) modelidir. Müqavilə məhz bu əsasda bağlandı və ictimaiyyətə Gürcüstanın əsrin layihəsini alacağı vəd edildi.
Deyirdilər ki, artıq 2020-ci ildə limana ilk gəmi daxil olacaq, investorların vəsaiti hesabına tikilmiş liman isə ölkəyə qalacaq və bu, guya ən yaxşı model idi.
Sonra eyni hakimiyyət öz əlləri ilə bu layihəni məhv etdi. 2022-ci ildə artıq yeni baş nazir və İqtisadiyyat nazirliyinin yeni komandası həll yolunun dövlətin 51% payla iştirakı və yeni tərəfdaşın axtarışı olduğunu bəyan edirdi.
2023-cü ildə eyni hakimiyyət artıq dövlət-özəl tərəfdaşlığı (PPP) modelini təqdim etdi, yeni beynəlxalq tərəfdaş axtarmağa başladı və məhz bu yolun optimal olduğunu iddia etdi.
Bu gün isə İqtisadiyyat naziri çıxış edərək bildirir ki, çıxış yolu artıq dördüncü modeldə — “Landlord’ (Mülkiyyətçi) modelindədir.
Bir hakimiyyət, dörd fərqli model və bir nəticə: dayandırılmış Anakliya. Əgər hər yeni model ən yaxşısı idisə, o zaman sadə bir sual yaranır: bəs niyə Anakliya limanı hələ də tikilmədi?”
Bu gün nazir daha bir bəyanatla çıxış etdi. O, bildirdi ki, Anakliya limanı eyni zamanda bir çox dövlət və şirkətlərlə tərəfdaşlıq çərçivəsində inkişaf edəcək.
Lakin bu gün də biz heç bir konkretlik olmadan yalnız mücərrəd bəyanatlar eşitdik. Üstəlik, bu vəd hakimiyyətin elə öz əvvəlki bəyanatları ilə tamamilə ziddiyyət təşkil edir.
On il ərzində onlar heç olmasa bir güclü beynəlxalq tərəfdaşı qoruyub saxlaya bilmədilər, indi isə ictimaiyyətə söz verirlər ki, eyni zamanda bir çox dövlət və şirkətləri cəlb edəcəklər.
Bəs haradadır o şirkətlər? Haradadır o tərəfdaşlar?
Reallıqda isə onlar özləri qərbli investorları və tərəfdaşları qorxudub qaçırıblar, beynəlxalq etimadı məhv ediblər, layihəni uzun illərdir dayandırıblar, sonra isə Çinin dövlət şirkətlərinə mərc ediblər.
Lakin bu istiqamətdə də onlar ölkə üçün inandırıcı və yekun bir nəticəyə nail ola bilmədilər.
“Gürcü Arzusu”nun idarəetmə tərzi belədir: hər uğursuzluqdan sonra yeni bir təqdimat, hər yerinə yetirilməyən vəddən sonra yeni bir model, hər uğursuzluqdan sonra yeni bir izahat.
“Problem heç vaxt BOT, PPP və ya Landlord modellərində olmayıb. Bütün dünyada bu modellərin hər biri ilə uğurla fəaliyyət göstərən limanlar var.
Problem strateji baxışı, beynəlxalq etimadı olmayan və milli əhəmiyyətli layihələri başa çatdırmağa qadir olmayan hakimiyyətdədir” — deyə İrakli Kupradze bəyan edib.
Onun xarakteristikasına görə, Anakliya sadəcə bir liman deyil, Gürcüstanın milli təhlükəsizlik məsələsidir, həmçinin ölkənin Avropa və Avroatlantik gələcəyinin layihəsidir. Kupradze hesab edir ki, liman Gürcüstan, Azərbaycan və Ermənistanın birgə iştirakı ilə tikilməli və Qafqazın bütün dünya üçün qapısına çevrilməlidir.
Birgə tərəfdaşlıq və Qafqazda sülh baxışı
Milli Təhlükəsizlik və İqtisadiyyat: “Bizim üçün Anakliya heç vaxt sadəcə bir liman olmayıb. Anakliya Gürcüstanın milli təhlükəsizliyidir.
Anakliya Gürcüstanın iqtisadi müstəqilliyidir. Anakliya ölkənin Avropa və Avroatlantik gələcəyinin layihəsidir”.
Şəffaflıq və Güclü İnvestorlar: Məhz bu səbəbdən biz — “Güclü Gürcüstan-Lelo” olaraq, ən başından bəyan edirdik ki, Anakliya limanı tam şəffaflıqla, Qərbli strateji tərəfdaşların, beynəlxalq maliyyə qurumlarının və güclü özəl investorların iştirakı ilə tikilməlidir.
Qara Dənizin Logistik Habı:
Anakliya Qara dənizin əsas logistik habına çevrilməli, Gürcüstanı Avropa ilə bağlamalı, ölkənin təhlükəsizliyini gücləndirməli, investisiyalar cəlb etməli və on minlərlə iş yeri yaratmalıdır.
Regional Əməkdaşlıq:
Liman Gürcüstan, Azərbaycan və Ermənistanın birgə iştirakı ilə tikilməli və Qafqazın bütün dünya üçün qapısı olmalıdır. Bu, güclü Gürcüstana, sülhə, rifaha və real inkişaf baxışına aparan yoldur.
Anakliya üç ölkənin tərəfdaşlıq, ümumqafqaz sülh, sabitlik və tərəqqi məkanına çevrilməlidir.
Tarix dəfələrlə sübut edib ki, davamlı sülh ən çox ölkələri ticarət, infrastruktur, investisiyalar və ümumi iqtisadi uğurun birləşdirdiyi yerdə möhkəm olur.
Qonşular birlikdə rifah yaradanda sülhün qiyməti artır, qarşıdurmanın bədəli isə əhəmiyyətli dərəcədə daha böyük olur.
“Gürcüstanın ən mühüm milli layihələrindən birini yerinə yetirilməmiş vədlərin, itirilmiş zamanın və əldən verilmiş fürsətlərin simvoluna çevirən hakimiyyəti dəyişmək vaxtıdır” — deyə İrakli Kupradze bəyan edib.
