“Sumud” humanitar donanmasının işinə baxan Türkiyə məhkəməsi, proses zamanı İnterpolun qırmızı bildirişi vasitəsilə İsrailin Baş naziri Benyamin Netanyahaya qarşı beynəlxalq axtarış elan edilməsi ilə bağlı aralıq qərar çıxarıb.
Verilən xəbərə görə, bu barədə Halk TV məlumat yayıb. Məlumata əsasən, İstanbul Cinayət Məhkəməsi Netanyahu və digər təqsirləndirilən şəxslərə qarşı bəşəriyyətə qarşı cinayətlər, soyqırım, azadlıqdan məhrumetmə, qəddar rəftar, qəsdən bədən xəsarəti yetirmə, qarət və nəqliyyat vasitəsinin müsadirə edilməsi ittihamları ilə həbs ordeni verib.
Mənbəyə görə, məhkəmə əvvəllər İstanbul Baş Prokurorluğunun onlar üçün ömürlük həbs tələb edən ittiham aktı əsasında Netanyahu və 34 yüksək rütbəli israilli məmura qarşı cinayət işi başlamışdı.
2025-ci ilin noyabrında İstanbul Baş Prokurorluğu Netanyahaya və İsrail rəhbərliyinə qarşı soyqırım, Qəzza zolağının kütləvi bombalanması və humanitar yardımın tədarükünə mane olma ittihamları ilə həbs orderi vermişdi.
“Sumud” donanması onlarla ölkənin fəallarını, həkimlərini və könüllülərini birləşdirən beynəlxalq mülki humanitar təşəbbusdur. Təşkilatçılar missiyaların məqsədinin Qəzza zolağına dəniz yolu ilə humanitar yardım çatdırmaq və beynəlxalq ictimaiyyətin diqqətini anklavdakı vəziyyətə və İsrailin dəniz blokadasına cəlb etmək olduğunu qeyd edirlər.
İsrail hakimiyyəti dəfələrlə blokadanın pozulmasına icazə verməyəcəklərini bəyan edib və donanmanın gəmilərini saxlayaraq onları İsrail limanlarına yönəldib.
Gəmidə olan fəallar həbs edilib və sonradan ölkədən çıxarılıb. 2026-cı ilin mayında 54 gəmidən və 39 ölkədən 426 iştirakçıdan ibarət donanma İsrail hərbçiləri tərəfindən saxlanılıb.
