Ermənistanın xarici işlər naziri Ararat Mirzoyan Brüsseldə Avropa Komissiyasının vitse-prezidenti, AB-nin Xarici işlər və təhlükəsizlik siyasəti üzrə ali nümayəndəsi Kaja Kallas ilə görüşüb. Alınan məlumata görə, bu barədə Ermənistan Xarici İşlər nazirliyi açıqlama yayıb.
Tərəflər ER–AB tərəfdaşlığının strateji gündəliyinin ardıcıl şəkildə həyata keçirilməsi məsələlərini müzakirə ediblər. May ayında Yerevanda keçiriləcək ER–AB sammitinin məzmun baxımından hazırlanmasına da ətraflı toxunulub.
Ermənistan vətəndaşları üçün konkret nəticələr verəcək proqramların həyata keçirilməsi istiqamətində razılıq vurğulanıb.
Ararat Mirzoyan və Kaja Kallas demokratik dayanıqlığın gücləndirilməsinə yönəlmiş təşəbbüsləri də müzakirə ediblər. Bu təşəbbüslər Ermənistan–AB dəyərlərə əsaslanan tərəfdaşlığının və strateji gündəliyinin mühüm hissəsi hesab olunur.
Bu çərçivədə demokratik proseslərə dəstək məqsədilə mövcud mexanizmlərin davamlılığı və effektivliyinin təmin edilməsi ilə bağlı razılıq əldə olunub.
Nazir və AB nümayəndəsi iqtisadi və nəqliyyat əlaqələrinin, həmçinin enerji sahəsində əməkdaşlığın inkişaf etdirilməsinin vacibliyini vurğulayıblar.
Görüşdə qarşılıqlı maraq doğuran digər məsələlər ətrafında da fikir mübadiləsi aparılıb.
