Avropa Şurası Ermənistandakı yeni mülki missiyanın təfərrüatlarını açıqlayıb
Avropa Şurası bəyan edib ki, Ermənistanda yeni AB Tərəfdaşlıq Missiyası (EUPM Armenia) Ümumi Təhlükəsizlik və Müdafiə Siyasəti çərçivəsində yaradılıb.
Bu missiya Ermənistanın demokratik dözümlülüyünün artırılmasına və böhranları idarəetmə qabiliyyətinin gücləndirilməsinə töhfə vermək məqsədini daşıyır.
Verilən məlumata görə, Avropa Şurasının rəsmi saytında yayımlanan bəyanatda aşağıdakı məqamlar qeyd olunub:
Missiya Ermənistana xarici məlumat manipulyasiyası və müdaxiləsi, kiberhücumlar və qanunsuz maliyyə axınları kimi çoxşaxəli təhdidlərlə mübarizədə dəstək verəcək.
EUPM Armenia müxtəlif nazirliklər və milli qurumlar üçün strateji məsləhətlər verəcək və potensialın gücləndirilməsini təmin edəcək.
Mandat və Rəhbərlik: Missiyanın ilkin mandatı iki il olacaq və əməliyyat qərargahı Ermənistanda yerləşəcək. Mülki əməliyyat komandanı Stefano Tomat olacaq, yerlərdəki fəaliyyətə rəhbərlik edəcək şəxs isə yaxın zamanlarda təyin ediləcək.
2 dekabr 2025-ci il tarixində AB-Ermənistan Tərəfdaşlıq Şurası təhlükəsizlik və müdafiə də daxil olmaqla bir çox sahədə münasibətlərin dərinləşdirilməsini nəzərdə tutan yeni strateji gündəliyi təsdiqləyib.
EUPM Armenia, Ermənistan hakimiyyətinin xahişi ilə yerləşdirilən ikinci mülki missiyadır.
O, 2023-cü ildə yaradılmış və məqsədi yerlərdə vəziyyəti müşahidə etmək olan AB-nin Ermənistandakı Missiyasından (EUMA) ayrı fəaliyyət göstərəcəkdir.
