Oktyabrın 28-də ER Təhlükəsizlik Şurasının katibi Armen Qriqoryan Maltada Ukrayna Prezidentinin Aparat rəhbəri Andrey Yermak ilə görüşüb. Bu haqda ER-in Ukraynadakı səfirliyi məlumatlandırıb.
Həmsöhbətlər Ermənistan və Ukrayna arasında ikitərəfli münasibətlərin hazırkı vəziyyətini müzakirə ediblər. Bu xüsusda Ukrayna Prezidenti Vladimir Zelenskinin oktyabrın 5-də Qranadada Avropa Siyasi Birliyinin Zirvə toplantısı çərçivəsində Ermənistanın Baş naziri Nikol Paşinyan ilə ilk görüşünün əhəmiyyəti qeyd edilib.
Andrey Ermak xüsusilə ER Baş nazirinin xanımı Anna Hakopyanın sentyabrın əvvəlində Kiyevdə keçirilən Birinci Xanımlar və Cənablar sammitində iştirakına və ukraynalı məktəblilərə humanitar yardım göstərdiyinə görə təşəkkür edib.
Prezident aparatının rəhbəri Ukrayna tərəfinin Ermənistanla əməkdaşlığı gücləndirmək, xüsusilə də Avropaya inteqrasiya məsələlərində sadiqliyini təsdiqləyib.
Tərəflər Ermənistan və Ukraynanın Beynəlxalq Atom Enerjisi agentliyinin rəhbərlər şurasına seçilməsi münasibətilə bir-birini təbrik edib və iki ölkənin bu təşkilat çərçivəsində və ümumilikdə enerji sahəsində əməkdaşlığını müzakirə ediblər.
