AŞPA-nın yay sessiyasının “Tərəqqi hesabatı”nın müzakirəsi zamanı “Ermənistan” fraksiyasının deputatı Armen Gevorqyan çıxış edib.
“2022-ci ildə Ermənistan hakimiyyəti Dağlıq Qarabağı Azərbaycanın bir hissəsi kimi tanıdı, bu tanınma sülh gətirmədi, əksinə, Azərbaycanı yeni ərazi iddiaları ilə çıxış etməyə sövq etdi.
Bu gün Azərbaycan “Qərbi Azərbaycan” adlanan konsepsiyanı aqressiv şəkildə təbliğ edir.
Bu humanitar təşəbbüs deyil, “azərbaycanlıların repatriasiyası” bəhanəsi ilə Ermənistan ərazilərinin daha da ələ keçirilməsinə yönəlmiş geosiyasi plandır. Bu insan haqları məsələsi deyil. Bu, demoqrafik manipulyasiya, tarixi yenidən şərh və infrastruktur tələbləri daxil olmaqla, diqqətlə hazırlanmış hibrid təzyiq strategiyası ilə Ermənistanın suverenliyini sarsıtmaq cəhdidir.
Bu, humanitar dillə pərdələnmiş, demoqrafik transformasiya üçün ideoloji-hüquqi baza yaratmaq və erməni rayonlarının daha da nəzarət altına alınması məqsədi daşıyan ekspansionist layihədir. Türk dünyası artıq Şimali Kiprdə və Şimali Suriyanın bəzi bölgələrində belə etnosiyasi ilhaq nümunələrini nümayiş etdirib. Növbəti hədəf Ermənistan ola bilər.
Xanım Prezident,
Bu günlərdə İran və İsrail arasında artan hərbi gərginlikdən Türkiyə koalisiyası Ermənistanın cənub rayonlarına nəzarəti bərqərar etmək üçün istifadə edə bilər. Hərbi təcavüz təhlükəsi ilə yanaşı, qondarma “miqrasiya ssenarisi” getdikcə daha reallaşır ki, bu da qondarma etnik türk qaçqınları adı altında Ermənistanın cənubuna demoqrafik axını nəzərdə tutur. Beləliklə, Ermənistanın suverenliyi müharibə ilə deyil, düşünülmüş siyasətlə pozula bilər.
Biz taktika dəyişikliyini tanımalıyıq. Lakin məqsəd eynidir: Ermənistanın suveren, öz müqəddəratını təyin edən dövlət kimi mövcudluğunu məhdudlaşdırmaq və “erməni məsələsi”ni həll etmək.
Çox adam məndən soruşur ki, bütün bunlarla bağlı Avropa nə edə bilər. Əvvəla, İlham Əliyevin diktatura rejimini legitimləşdirməyin. Söhbət təkcə Azərbaycan qazından, neftindən, milyardlarla avro investisiyadan getmir.
Avropa bu rejimin möhkəmləndirilməsində, məsələn, ermənilərin etnik təmizləməsindən və saxta “prezident” və “parlament” seçkilərindən sonra belə Bakıda keçirilən COP29 konfransına fəal dəstək verməklə birbaşa iştirak edir.
Bu yaxınlarda 2028-ci ildə Avropa Siyasi Birliyinin zirvə toplantısının Bakıda keçirilməsi ilə bağlı daha çox narahatlıq doğuran açıqlama oldu. Bundan sonra Azərbaycanın “Qərbi Azərbaycan” proqramını tam şəkildə həyata keçirməyə çalışacağı və növbəti Avropa sammitindən nəticələri legitimləşdirmək üçün istifadə edəcəyi ciddi ehtimal var.
Hörmətli həmkarlar,
Regional sabitliyi və sülhü təhdid edən ziddiyyətli hekayələri dayandırmağın vaxtıdır. Biz həm də ondan narahat olmalıyıq ki, bu gün demokratiyanın avtoritarizmə təslim olmasının müasir tarixi artıq yazılır”.
