Qarşıdan gələn parlament seçkilərində Ermənistan xalqı Qarabağ hərəkatının davam edib-etməyəcəyinə qərar verməlidir. Alınan məlumata görə, bu barədə Ermənistan Respublikasının Baş naziri Nikol Paşinyan Parlament – Hökumət sual-cavabı zamanı deyib.
O, “Mülki Müqavilə” partiyası seçilməyəcəyi təqdirdə müharibə olacağı ilə bağlı bəzi dairələrdə təhdid kimi qəbul edilən ifadələrinə münasibət bildirərkən bu fikirləri səsləndirib.
O, xatırladıb ki, 2020-ci ildə xalqı təhlükələr barədə xəbərdar etmədiyi üçün ona qarşı çox böyük ittihamlar irəli sürülüb. Baş nazir bu ittihamlardan və səhvlərdən nəticə çıxardığını vurğulayıb.
“Bu seçkidə xalq aşağıdakıları deməlidir:
Qarabağ hərəkatı davam edir, yoxsa etmir? Bu gün ‘Vətəndaş Müqaviləsi” siyasi əksəriyyət olaraq Qarabağ hərəkatını davam etdirməmək qərarına gələn yeganə siyasi qüvvədir.
Digər bütün qüvvələr Qarabağ hərəkatını davam etdirəcəklərini deyirlər. Buna xalq qərar verməlidir. Əgər Qarabağ hərəkatının davam etməsi qərara alınarsa, bu, müharibə deməkdir, çünki Qarabağ hərəkatı müharibədir.
Əgər sülh qərarı verilərsə, deməli Qarabağ hərəkatını davam etdirmirik. Bu, çox sadə bir seçimdir” — deyə Paşinyan vətəndaşlarla açıq danışmağın vacibliyini qeyd edib.
Müstəqillik Bəyannaməsinə toxunan Baş nazir deyib ki, bu, müstəqillik bəyannaməsi deyil, əksinə, münaqişə və asılılıq bəyannaməsidir.
“Biz hamımız siyasətlə məşğul olan insanlar kimi Qarabağ hərəkatından doğulmuşuq, oradan gəlmişik. Lakin əgər biz üzləşməsək, dəyişməsək, deməli bizim tarixi taleyimiz də dəyişməyəcək” — deyə o, qeyd edib.
