Pharrell Williams Bakıda azadlıqdan danışıb
Tanınmış müğənni Pharrell Williams Bakıda “Formula-1” yarışlarının sonuncu günü çıxış edərkən azadlıq çağırışları edib. “Azadlıq” radiosu” “Hüquqlar uğrunda idman” koalisiyasına istinadən bildirir ki, bu, həmin koalisiyanın müğənninin menecmentinə göstərdiyi təzyiqin sayəsində mümkün olub.
Bu barədə contact.az xəbər verir.
Müğənni deyib ki, Azərbaycanda gənclər gələcəkdə dəyişiklik edəcəklər və “onları heç kəs dayandıra bilməz”.
“Bakıdakı bu coşqun çıxış “Hüquqlar uğrunda idman” koalisiyasının xahişinə cavabdır. Koalisiya müğənnidən xahiş etmişdi ki, “Formula-1” Avropa Qran-prisindəki çıxışında insan haqlarından danışsın”, – koalisiyanın yaydığı press-relizdə deyilir.
Koalisiya xatırladır ki, UNESCO-nun Guillermo Cano Ümumdünya Mətbuat Azadlığı mükafatı laureatı, “Azadlıq” radiosunun araşdırmaçı-jurnalisti Xədicə İsmayılova da bir gün öncə “The Washington Post” qəzetində dərc olunmuş məqaləsiylə Pharrellin səsinə səs qatmışdı.
Qurum bildirir ki, fəallar Pharrell-in «gənclər» deməklə, Azərbaycanda “korrupsioner hakim rejim”ə qarşı çıxmış NİDAçı gəncləri nəzərdə tutmasına inanır.
Pharrel Bakıda izləyicilər qarşısında belə deyib: “Azərbaycan gəncliyindən ötrü səs-küy qaldırın! Bu gözəl uşaqlar gələcəkdirlər! Gələcək onlardır! Onlar böyüyəndə təkcə buranı deyil, bütün dünyanı dəyişəcəklər və onları heç kəs dayandıra bilməyəcək. Onların yoluna heç kəs çıxa bilməz”.
Pharell daha sonra deyib: “Bu gecə burada “Azadlıq” mahnısını gəlin birlikdə oxuyaq. Sizi dua etməyə çağırıram… dua edin ki, bu uşaqlar böyüyüb təkcə bu ölkədə deyil, bütün dünyada dəyişiklik etsinlər… “Azadlıq» oxuyun! Azadlıq!”.
“Hüquqlar uğrunda İdman” koalisiyasından Rebecca Vincent deyib: “Pharrell Williams-ın bizim çağırışımıza hay verərək Bakıda səhnədə azadlıqdan danışmasından çox həyəcanlandıq. Ümid edirik ki, həmin konsertdə yüksək səviyyədə təmsil olunmuş Azərbaycan hakimiyyəti Pharrell-in çağırışını eşidəcək və həbsdəki gənc fəalları, onlarla siyasi məhbusu azadlığa buraxacaq”.
“Hüquqlar uğrunda idman» koalisiyası Azərbaycanda insan haqları pozuntularına işıq salır. Qurum Azərbaycanı dünyada azadlığın ən aşağı səviyyədə olduğu ölkələrdən biri sayır. “Sərhədsiz Reportyorlar” təşkilatı Azərbaycanı mətbuat azadlığına görə 180 ölkə arasında 163-cü yerə qoyub.
Beynəlxalq qurumlar Azərbaycanda 70 «siyasi məhbus»un olduğunu desə də hakimiyyət bu termini qəbul etmir, ölkədə bütün siyasi hüquq və azadlıqların tam təmin olunduğunu bildirir.
