Qətlə yetirilən qadınlar
“Ailə üzvlərinə qarşı olan cinayətlərin çoxalmasına səbəb cəmiyyətdəki aqressiyanın artmasıdır”.
“2016-cı ildə Azərbaycanda məişət zorakılığı nəticəsində 29 qadın öldürülüb”, – bunu “Report”a açıqlamasında Ailə, Qadın və Uşaq Problemləri üzrə Dövlət Komitəsinin Hüquqi təminat şöbəsinin müdiri Taliyə İbrahimova deyib.
O, məişət zəminində baş verən cinayətlərin səbəblərinin müxtəlif olduğunu söyləyib. Əsas səbəb kimi ailə münaqişəsini göstərib:
“Bu münaqişlərin çoxu qısqanclıqla bağlıdır. Ailə üzvünün narkotik maddə, alkoqol istifadəçisi olması da münaqişələrə gətirib çıxarır”.
“Təmiz Dünya” Qadınlara Yardım İctimai Birliyinin sədri Mehriban Zeynalova deyir ki, əgər gender, məişət zorakılığı haqqında qanunlar varsa, bu problemlərin qarşısının alınması üçün tədbirlər də olmalıdır:
“Bizdə qadını müdafiə edən kifayət qədər sənəd var. Ancaq real praktikada biz bunu görmürük. Deməli, fərqli bir yol tapılmalıdır. Cəzalanma, qaynar xətt, qadınların vaxtında müraciət edə biləcəyi mərkəzlərin olması vacibdir. Ancaq vəziyyət onu göstərir ki, qadınların evdə öldürülməsi faktlarının qarşısının alınmasında ürəkaçan dəyişiklik yoxdur”.
